போலி-காலாவதியான மருந்துகளை
பொது மக்கள் தவிர்ப்பதில் கவனமாக இருக்க வேண்டும் என்று நெஞ்சக நோய் மருத்துவ
நிபுணர் செ.நெ. தெய்வநாயகம் கூறினார்.
உடல் நலக் குறைவு ஏற்படும் நிலையில் மருத்துவரின்
பரிந்துரையின்றி நேரடியாக மருந்துக் கடைக்காரரிடம் மருந்து வாங்கிச்
சாப்பிடாமல் இருத்தல், நோய்க்கான காரணத்தை மருத்துவரிடம் முழுமையாகக் கேட்டுத்
தெரிந்து கொள்ளுதல், சிகிச்சைக்கு
டாக்டர் பரிந்துரைக்கும் மாத்திரைகள் குறித்த விவரம், பிரபலமான-தரமான மருந்துக் கடைகளில்
மட்டுமே மருந்துகளைத் தொடர்ந்து வாங்குதல், உடனடியாக நிவாரணம் பெற நினைத்து
அதிக அளவுக்கு மருந்துகள் சாப்பிடுவதைத் தவிர்த்தல் ஆகியவற்றை பொதுமக்கள்
கட்டாயம் கடைப்பிடிக்க வேண்டும் என்று அவர் வலியுறுத்தினார்.
இது
தொடர்பாக அவர் மேலும் கூறியதாவது:
''வைரஸ், பாக்டீரியா காரணமாக ஜலதோஷம் ஏற்பட
வாய்ப்பு உண்டு. வைரஸ் காரணமாக மூக்கு, சைனஸ், தொண்டைப் பகுதியில் ஏற்படும்
ஜலதோஷம் மருந்துகள் ஏதும் இன்றி இயல்பாக சரியாகி விடும்.
குறிப்பாக குழந்தைகளுக்கு ஆண்டுக்கு ஆறு முறை இத்தகயை ஜலதோஷம் ஏற்படுவது
இயல்பானது.
ஆனால்,
பயம்-அறியாமை காரணமாக பல
பெற்றோர் ஆன்டிபயாட்டிக் மருந்துகளை குழந்தைக்குக் கொடுத்து குழந்தையின்
நோய் எதிர்ப்புச் சக்திக்கு பாதிப்பு ஏற்படுத்துகின்றனர். மார்புச்
சளி, ஒவ்வாமைச் சளி
ஆகியவற்றுக்கு சிகிச்சை தேவைப்படும்.
